Në përkujtimin e 27-vjetorit të rënies së regjimit komunist, Sali Berisha u shpreh se komunizmi ka rënë, por mbetjet e tij janë super toksike.

Berisha u shpreh se kulti i Enver Hoxhës ishte qëllimi kryesor i lëvizjes antikomuniste, ndaj mjediset universitare u kërkua të zbrazeshin nga bustet dhe fotot e diktatorit.

“Lëvizja studentore u mbështet nga sindikatat dhe qytetarët. Atë ditë Ramiz Alia dha urdhër në një mbledhje ushtarake që të qëllohej mbi protestuesit. Kjo është e vërteta, që urdhri u dha, por mbetet në meritën e atyre që nuk qëlluan mbi qytetarët.Qytetarët ishin të vendosur të rrëzonin kultin e diktatorit Enver Hoxha dhe e arritën këtë”.

Berisha tha se dallimi më esencial mes Enver Hoxhës e Ramiz Alisë është se “Enver Hoxha ishte diktator me kult, edhe Ramiz Alia ishte diktator, por Ramiz Alia s’ndërtoi dot kult ndaj dhe nxori dekretin pastaj filloi stuhinë e telegrameve për të nxjerrë jashtë lojë Partinë Demokratike”.

Në aktivitetin për 27-vjetorin e rrëzimit të bustit të diktatorit, mbështetur nga fondacioni “Konrad Adenauer”, një vend të posaçëm, pati pasqyrimi mediatik i 20 shkurtit.

Folën gazetarja e “Tanjug”, një gazetar italian që ishte atë ditë në shesh, Elez Biberaj i “Zërit të Amerikës” dhe Besnik Mustafaj që raportonte për “AFP”./Top Channel